९ भदौ, कामना। 

सांसदहरूले प्रधानमन्त्री बालेन्द्र शाहलाई सीमा लगायतका विषयमा संसद्मा प्रश्न सोध्ने भएका छन् ।प्रधानमन्त्रीलाई सोधिने प्रश्नहरू तयार भएका छन् । तर, बुधबार प्रतिनिधिसभाको बैठकमा प्रधानमन्त्रीसँग प्रत्यक्ष प्रश्नोत्तर कार्यक्रम सञ्चालन हुँदैगर्दा मात्रै ती विषय सार्वजनिक हुनेगरी व्यवस्थापन गरिएको संसद् सचिवालयले जनाएको छ ।
प्रश्नकर्ता सांसदहरूको नाम सार्वजनिक भएको छ । तर, उनीहरूलाई के कस्ता प्रश्न छन्, भनेर सञ्चारमाध्यम र सार्वजनिक रूपमा राख्न बन्देज गरिएको छ ।

‘प्रधानमन्त्रीसँगको प्रश्नोत्तर जीवन्त होस्’ भन्ने ध्येयले नै प्रश्नसँग सम्बन्धित विषयलाई व्यवस्थित गरिएको संसद् सचिवालयका अधिकारीहरू बताउँछन् ।
‘राष्ट्रियताको सन्दर्भ, सीमाना सम्बन्धी विषय, सरकारको कामकारबाही र त्यसका शैलीमा प्रश्न छन्’, स्रोतले भन्यो, ‘सांसदहरूले विषयकेन्द्रित भएरै प्रश्न दर्ता गरेका छन् ।’प्रतिनिधिसभा नियमावलीको नियम ५६ मा प्रधानमन्त्रीसँग प्रत्यक्ष प्रश्नोत्तर कार्यक्रम सम्बन्धी व्यवस्था छ ।

यसअनुसार सभामुख डोल प्रसाद अर्यालले उनले बुधबारका लागि प्रधानमन्त्रीसँग प्रत्यक्ष प्रश्नोत्तर कार्यक्रम तय गरेका हुन् ।सभामुख अर्यालले प्रधानमन्त्री बालेनलाई प्रश्न सोध्न चाहने सांसदहरूलाई भदौ ५ गतेभित्र प्रश्न दर्ता गर्न समय दिएका थिए । त्यसअनुसार ११ जना सांसदले प्रश्न दर्ता गरेका छन् । प्रश्नकर्ता सांसदहरूमा सत्तारुढ दल राष्ट्रिय स्वतन्त्र पार्टीका सांसदहरू समीक्षा बास्कोटा, कृष्णहरि बुढाथोकी र अमरेशकुमार सिंह छन् ।

प्रमुख प्रतिपक्षी दल नेपाली कांग्रेसकी प्रमुख सचेतक बासना थापा र सांसद गीता गुरुङले प्रश्न सोध्दैछन् ।नेकपा एमालेका प्रमुख सचेतक ऐनबहादुर महर र सांसद गणेशसिंह ठगुन्नाले प्रश्न सोध्नेगरी नाम टिपाएका छन् ।नेपाली कम्युनिस्ट पार्टीका सांसद् वर्षमान पुन र प्रमेशकुमार हमालले प्रश्न सोध्नेछन् ।श्रम संस्कृति पार्टी संसदीय दल नेता हर्कराज राई र राष्ट्रिय प्रजातन्त्र पार्टी की प्रमुख सचेतक खुश्बु ओलीले प्रश्न सोध्ने छिन् ।