काठमाडौँ । सुनको मूल्यमा एकैदिन ३ हजार ४ सय रुपैयाँको गिरावट आएको छ। नेपाल सुनचाँदी व्यवसायी महासंघका अनुसार मंगलबार नेपाली बजारमा छापावाला सुनको कारोबार प्रतितोला ९४ हजार ८ सय रुपैयाँ तोकिएको छ। सोमबार ९८ हजार २ सय रुपैयाँ प्रतितोलामा यस्तो सुनको कारोबार भएको थियो। 

त्यस्तै, तेजाबी सुनको मूल्य प्रतितोला ९४ हजार ३ सय रुपैयाँमा कारोबार भइहेको छ। अघिल्लो दिन ९७ हजार ७ सय रुपैयाँमा कारोबार भएको थियो। अघिल्लो दिन १ हजार २ सय ८५ रुपैयाँ रहेको चाँदीको भाऊ पनि घटेर १ हजार २ सय १५ रुपैयाँमा सीमित भएको छ। 

सुनको भाऊ यसरी घट्नुमा अन्तर्राष्ट्रिय बजारमा कोरोनाविरुद्धको खोपको सफल परीक्षण हुनुलाई प्रमुख कारण मानिएको छ। अमेरिकी–जर्मन स्वास्थ्य विज्ञले निर्माण गरेको खोप ९० प्रतिशत प्रभावकारी देखिएको खबरसँगै अन्तर्राष्ट्रिय बजारमा सुनको मूल्यमा गिरावट देखिएको हो। यसको प्रत्यक्ष प्रभाव नेपाली बजारमा परेको हो। 

नेपाले अन्तर्राष्ट्रिय बजारको मूल्य र नेपालले सुन आयातमा लगाउँदै आएको भन्सार महसुललाई जोडेर नेपाली बजारको मूल्य निर्धारण हुँदै आएको छ। अन्तर्राष्ट्रिय बजारमा यस्तो खबर फैलिएसँगै सोमबार अन्तराष्ट्रिय बजारमा १ हजार ९ सय ६३ डलर प्रतिऔंसमा खुलेको बजार १ हजार ८ सय ६२ डलर प्रतिऔसमा झरेर बन्द भएको थियो। मंगलबार भने यो मूल्यमा सामान्य वृद्धि भएर कारोबार भइरहेको छ।